Ek Aisa Daur ~ A poem about unrequited love

EK AISA DAUR....

Itefaaq ke kisson mein ek kissa aur bhi hoga..
Hum tum milenge, ek aisa daur bhi hoga....

Us daur mein na hogi parwah zamane ki
Na pyaar ko chupane ki, na pyar ko bhulane ki.

Na hogi yeh bebasi, na hogi majburiyan.
Na honge yeh faasle, na hogi yeh dooriyan.

Itefaaq ke kisson mein ek kissa aur bhi hoga....
Hum tum milenge, ek aisa daur bhi hoga....

Na honge hum tum ajnabee, ek dusre ko jaankar
Na muh pher lenge yoon, ek duje ko pehchankar.

Jazbaat yahi honge, par na hogi yeh rasmein.
Honge pakke irade, aur na yeh kacchi kasmein.

Itefaaq ke kisson mein ek kissa aur bhi hoga....
Hum tum milenge, ek aisa daur bhi hoga...

Jaha kuch ankaha bhi reh gaya, toh wo ansuna na hoga.
Na galatfemiyon ki aag hogi, na ranjisho ka dhuaan hoga.

Na yeh shikwe, na gile, na hogi aham ki deewarein;
Koi teesre ke liye jagah ban jaye, na hogi aisi darrarein.

Itefaaq ke kisson mein ek kissa aur bhi hoga...
Hum tum milenge, ek aisa daur bhi hoga...

Bheed mein is kadar na honge hum tum akele, 
Na hogi waqt ki pabandiya, na duniya ke jhamele.

Wo waqt bhi hamara hoga, hogi apni takdeerein
Jab saath na chodengi yun haathon ki lakeerein.

Itefaaq ke kisson mein ek kissa aur bhi hoga...
Hum tum milenge, ek aisa daur bhi hoga...

Yun milenge hum tum, jaise khoya hua khazana mil jaye.
Ek bhatke hue musaafir ko, maano thikana mil jaye.

Us daur mein, "main" aur "tum" kuch is tarah "hum" ho jayenge.
Saare wajood bikher jayenge, kuch aise reham ho jayenge. 

Itefaaq ke kisson mein ek kissa aur bhi hoga...
Hum tum milenge, ek aisa daur bhi hoga.....