Ek Aisa Sheher ~ a poem about an ideal world!

Kya kahin aisa sheher bhi basta hai,
Jahan har gali mein, har bacha hasta hai?

Jahan na bhookh ki fikr, na pyaas ka dar,
Jaha na sirf har ghar mein, par har dil mein khuda rehta hai.
Kya kahi aisa sheher bhi basta hai?

Jaha sardi ki kadakti raat mein, koi badan na nanga ho. 
Jaha dharm aur jaat ke naam pe kabhi na koi danga ho.
Jaha kisika dukh dekhdar dil hasta nahi, sisakta hai.
Kya kahi aisa sheher bhi basta hai?

Jaha chal karne mein insaan ka zameer jijakta hai,
Jaha mehenge hai jazbat, aur imaan na itna sasta hai!
Kya kahi aisa sheher bhi basta hai?

Jaha kisi ka dard dekh kisiko neend nahi aati,
Jaha insaan ki insaniyat hai phir jaag hati,
Jahan insaan ki seva hi jannat ka rasta hai!
Kya kahi aisa sheher bhi basta hai?

Ek aisi duniya, jisme duniyadaari nahi,
Jaha bhookh nahi hai, laachari nahi!
Daulat ki lalsa nahi, dhan ki khumari nahi,
Jaha insaan ko insaan manna hi rab ka sadqa hai!
Kya kahi aisa sheher bhi basta hai?

Le chalo mujhe, agar kahin aisa sheher bhi basta hai...
Haan, shayad is duniya se pare uska rasta hai.....