Samundar se aage, kshitij ke pehle, door kahin ek desh hai
Lagta hai mere desh sa hi, lekin wo pardes hai.
Is pardes mein bhi hai mere desh si mitti, mere desh sa paani.
Par is mitti mein nahi hai mere desh ki khusbu suhaani.
Is pardes mein bhi hai mere desh si hawa, wahin si zameein
Sabkuch hai yahaan, par na jaane kyu lagti hai kuch kami.
Samundar se aage, kshitij ke pehle, door kahin ek desh hai
Lagta hai woh mere desh sa hi, lekin wo pardes hai.
Is pardes mein hai unchi imaratein, aur bade makaan.
Par nahi milta yahaan choti choti khushiyon ka mukaam.
Is pardes mein hai buland sadke, na mere desh si kacchhi.
Par un sadko pe koi bhula bisra yaar mil jaye, itni bhi nahi wo acchhi.
Samundar se aage, kshitij ke pehle, door kahin ek desh hai
Lagta hai woh mere desh sa hi, lekin wo pardes hai.
Pardes mein na hai mere desh ke masle, mere desh ke jhamele,
Milti hai yahaan saari sahuliyatein, bas nahi milte apno ke mele.
Na hai yahaan apno ki basti, na bheed mein dikhte apno ke chehre.
Sabkuch hai is watan-e-bahaar mein, bas rishte nahi woh gehre.
Samundar se aage, kshitij ke pehle, door kahin ek desh hai
Lagta hai woh mere desh sa hi, lekin wo pardes hai.
Is pardes mein bhi hai mere desh si bandagi, mere desh sa asmaan.
Par na is asmaan mein gunjte mandir ke ghant, na yahaan ki hawa mein ghulti azaan.
Pardes ka tassavur hai itna sundar, maano jaise koi sundar sapna.
Sabkuch diya hai is desh ne mujhe, par na jaane kyu dil ko lagta nahi yeh apna.
Samundar se aage, kshitij ke pehle, door kahin ek desh hai
Lagta hai woh mere desh sa hi, lekin wo pardes hai…..
Kai baar dil chahta hai apni zameen, apne watan laut jau.
Yeh dil to maan jaata hai, par apne zehan ko kaise manau.
Maana naimetain hazzar mili hai mujhe is pardes mein
Lekin meri rooh ka ek hissa, rahega hamesha mere desh mein.
No comments:
Post a Comment